وزیراعظم کی نا درا کے مراکز میں پاسپورٹ دفتر کے کاؤنٹرز قائم کرنے کی ہدایات

اسلام آباد(صباح نیوز)وزیر اعظم میاں محمد شہبازشریف نے ہدایت کی ہے کہ شہریوں کے لئے شناختی کارڈ اور پاسپورٹ کے حصول میں آسانیاں پیدا کی جائیں۔ نادرا کے مراکز میں پاسپورٹ دفتر کے کاؤنٹرز قائم کئے جائیں۔کفایت شعاری اور بچت کو مدنظر رکھتے ہوئے نادرا اور ڈائریکٹوریٹ جنرل آف امیگریشن اینڈ پاسپورٹس دفتر کی جگہ اور وسائل شیئر کریں تاکہ قومی خزانے پر کم بوجھ پڑے جبکہ وزیر اعظم نے شہریوں کو شناختی کارڈ کی سروس ان کی دہلیز پر مہیا کرنے کے لئے موبائل نادرا وینز کی تعداد فوری بڑھانے کے احکامات جاری کئے ہیں۔ وزیراعظم محمد شہباز شریف کی زیر صدارت شہریوں کے لئے شناختی کارڈ اور پاسپورٹ کے حصول میں آسانیاں پیدا کرنے کے حوالے سے ایک اہم اجلاس بدھ کے روز اسلام آباد میں منعقد ہوا۔اجلاس کے شرکا ء سے گفتگو کرتے ہوئے وزیراعظم نے کہا کہ شناختی کارڈ اور پاسپورٹ کا حصول ہر شہری کا بنیادی حق ہے۔انہوں نے تاکید کی کہ عام شہریوں کو انکے گھر کی دہلیز پر شناختی کارڈ اور پاسپورٹ کی فراہمی کے حوالے سے اقدامات میں مزید بہتری لائی جائے اور یہ یقینی بنایا جائے کہ ہر شہری کو اس حوالے سے یکساں سہولیات میسر ہوں۔اس تناظر میں وزیراعظم نے نادرا کی وینز کی تعداد بڑھائی فوری بڑھانے کے احکامات بھی دیئے۔وزیراعظم نے ہدایت کی کہ کفایت شعاری اور بچت کو سامنے رکھتے ہوئے نادرا مراکز میں پاسپورٹ کے کاؤنٹرز قائم کئے جائیں۔انہوں نے مزید ہدایت کی کہ نادرا اور ڈائریکٹوریٹ جنرل آف امیگریشن اینڈ پاسپورٹس دفتر کی جگہ اور وسائل شیئر کریں تا کہ قومی خزانے پر کم سے کم بوجھ پڑے۔وزیراعظم نے احکامات دیئے کہ پاسپورٹ دفاتر کے قیام کے جتنے بھی منصوبے منظور ہو چکے ہیں وہ نادرا کے پہلے سے موجود دفاتر میں قائم ہوں۔اجلاس کو بریفنگ میں بتایا گیا کہ صارفین کی سہولت کے لئے نادرا ایک نئی موبائل فون ایپلیکیشن شروع کرنے جا رہا ہے جس کے ذریعے گھر بیٹھے شناختی کارڈ کی تجدید ہو سکے گی۔اجلاس میں وفاقی وزیر خزانہ و محصولات سینیٹر محمداسحاق ڈار،وفاقی وزیر داخلہ رانا ثنا اللہ خان،وفاقی وزیر تعلیم رانا تنویر حسین،چیئرمین نادرا،ڈائریکٹر جنرل امیگریشن اینڈ پاسپورٹس اور متعلقہ اعلیٰ سرکاری افسران نے شرکت کی۔