آزادجموں و کشمیر کے وزیراعظم چوہدری انوارالحق سے وزیر حکومت چوہدری اظہر صادق کی قیادت میں ڈڈیال کے وفد نے جموں کشمیر ہاؤس اسلام آباد میں ملاقات کی ۔ وفد سے گفتگو کرتے ہوئے وزیراعظم چوہدری انوارالحق نے کہا کہ مجھے عام طرز زندگی پسند ہے آرام و عیش کی زندگی چھوڑ کر اس کٹھن راہ کا انتخاب کیا ہے اب صرف اپنے لوگوں کیلیے کام کرنا چاہتا ہوں ۔ انہوں نے کہا کہ ریاست پاکستان کی وجہ سے بجلی تین روپے یونٹ اور آٹا دو ہزار روپے من ہے اس لئے ریاست پاکستان مخالف بیانیے کی اجازت نہیں دی جائے گی ، سبز ہلالی پرچم ہماری امنگوں اور عظمتوں کا نشان ہے اس کی سربلندی میں ہی ہماری بلندی ہے۔ ریاست کو ترقی کی شاہراہ پر گامزن کرنے کیلئے اصلاحات کا عمل جاری ہے جس کا مقصد عام آدمی کی فلاح وبہبود ہے ، ترقیاتی منصوبوں کا دائرہ کار پسماندہ علاقوں تک پھیلایا جا رہا ہے تاکہ ریاست کے ایسے حصوں کو ترقی دی جا سکے جو اس عمل میں شامل نہیں ہو سکے ہیں ۔آپ لوگ بھی اپنے اپنے علاقے میں ہونے والے ترقیاتی عمل پر نظر رکھیں اور ترقیاتی کام کی نگرانی کریں جہاں کہیں خرابی نظر آئے اس سے فوری آگاہ کریں تاکہ بروقت ایکشن لیا جا سکے ۔انہوں نے کہا کہ آزادکشمیر بھر میں بائیو میٹرک کے نفاذ سے ملازمین کی حاضریوں کے نظام میں بہت بہتری آئی ہے اس عمل کو جاری رکھیں گے کیونکہ اس میں لوگوں کا فائدہ ہے ۔انہوں نے کہا کہ 20 ماہ میں ایسے ایسے کام کیے ہیں جس کی نظیر ریاست کی تاریخ میں نہیں ملتی ،10 ارب کی لاگت سے سوشل پروٹیکشن فنڈ کا قیام عمل میں لایا گیا جس سے یتیموں ،بیواوں ،بزرگوں ،طلاق یافتہ خواتین اور ٹرانس جینڈر کو مالی معاونت ملے گی ۔انہوں نے کہا کہ تاریخی ہیلتھ پیکج دیا جس سے ریاست بھر میں لوگوں کو علاج معالجے کی بہتر سہولتیں میسر آئیں گی ۔انہوں نے کہا کہ جلد تاریخی تعلیمی پیکج بھی دیں گے ۔وزیر حکومت چوہدری اظہر صادق نے کہا میرے حلقے کے لوگوں کی خواہش تھی کہ آپ سے ملاقات کی جائے یہ آپ کے عوام دوست اقدامات کو پسند کرتے ہیں اور انہیں خراج تحسین پیش کرتے ہیں ۔ وفد نے وزیراعظم کا شکریہ ادا کیا- انہوں نے وزیراعظم کے عوام دوست اقدامات کو سراہا اور انہیں تاریخی کاموں پر خراج تحسین پیش کیا۔
0
