مظفرآباد (نامہ نگار) – آزاد جموں و کشمیر میں بڑھتی ہوئی آبادی اور اس سے جڑے مسائل کے پیش نظر، چیف سیکرٹری آزاد کشمیر خوشحال خان کی زیر صدارت ایک اہم اجلاس منعقد ہوا، جس میں آزاد کشمیر کی پاپولیشن پالیسی کے حوالے سے تفصیلی بریفنگ دی گئی۔
اجلاس میں سیکرٹری پلاننگ اینڈ ڈویلپمنٹ، مختلف محکموں کے سینئر افسران، اور ماہرین نے شرکت کی۔ اجلاس کا مقصد آزاد کشمیر میں آبادی کے تیزی سے بڑھتے ہوئے دباؤ، وسائل کی تقسیم، اور آئندہ کی منصوبہ بندی کے لیے مؤثر حکمت عملی مرتب کرنا تھا۔
اجلاس سے خطاب کرتے ہوئے چیف سیکرٹری خوشحال خان نے کہا کہ آبادی میں اضافے سے متعلقہ چیلنجز سے نمٹنے کے لیے مربوط اقدامات کی ضرورت ہے۔ انہوں نے کہا کہ حکومت آزاد کشمیر پاپولیشن پالیسی کے تحت تعلیم، صحت، خواتین کے حقوق اور عوامی آگاہی کو فروغ دے رہی ہے تاکہ مستقبل کے مسائل سے بچا جا سکے۔
انہوں نے مزید کہا کہ تمام ادارے مل کر مربوط پالیسی ترتیب دیں اور زمینی حقائق کے مطابق عملی اقدامات یقینی بنائیں۔
اجلاس میں پاپولیشن ویلفیئر ڈیپارٹمنٹ کی جانب سے موجودہ صورتحال، چیلنجز اور تجاویز پر مبنی پریزینٹیشن بھی پیش کی گئی، جس میں مختلف علاقوں کے اعداد و شمار اور منصوبہ بندی کے نکات شامل تھے۔
اجلاس کے اختتام پر یہ فیصلہ کیا گیا کہ آئندہ آنے والے مہینوں میں تمام اضلاع میں پاپولیشن پالیسی کے نفاذ کو یقینی بنایا جائے گا اور اس حوالے سے نگرانی کا مؤثر نظام وضع کیا جائے گا۔
