ڈیلی پرل ویو.تتہ پانی (نامہ نگار) — حالیہ پاک بھارت کشیدگی میں مسلح افواج پاکستان کی شاندار کامیابی اور دشمن کو منہ توڑ جواب دینے پر تتہ پانی کے عوام بھی سڑکوں پر نکل آئے۔ شہریوں کی بڑی تعداد نے پاک فوج کی مقامی یونٹ میں پہنچ کر افسران و جوانوں پر گل پاشی کی، ہار پہنائے اور فلک شگاف نعرے لگاتے ہوئے افواج پاکستان کو خراج تحسین پیش کیا۔
اظہار تشکر ریلی، سیاسی و سماجی قیادت کی شرکت
انجمن تاجران و سول سوسائٹی تتہ پانی کے زیر اہتمام ایک بڑی ریلی نکالی گئی جس میں سینکڑوں شہری، تاجر اور سماجی رہنما شریک ہوئے۔ ریلی سے خطاب کرنے والوں میں شامل تھے:
وزیر ہائیر ایجوکیشن ظفر اقبال ملک
مرکزی ایڈیشنل سیکرٹری جنرل مسلم لیگ ن ذوالفقار علی ملک
صدر ڈسٹرکٹ بار کوٹلی سردار آفتاب انجم ایڈووکیٹ
جنرل سیکرٹری انجمن تاجران خواجہ ساجد حسین
ایس ایچ او تھانہ تتہ پانی محمد خلیل چوہدری
مرکزی جنرل سیکرٹری PFUC محمد آصف ملک
صدر پرائیویٹ سکولز ایسوسی ایشن ملک غلام عباس
سابق اے ای او امتیاز حسین، انجینئر عدنان سلطانی، مسعود احمد ملک و دیگر
پاک فوج ہمارا فخر، بھارت کو منہ توڑ جواب ملا — مقررین
ریلی سے خطاب میں مقررین نے کہا:
“مسلح افواج پاکستان ہمارے ماتھے کا جھومر ہیں، انہوں نے بھارت کے غرور کو خاک میں ملا دیا۔”
انہوں نے آرمی چیف جنرل حافظ عاصم منیر اور پوری عسکری قیادت کو زبردست خراج تحسین پیش کیا اور اس عزم کا اظہار کیا کہ:
“ہم اپنی افواج کے ساتھ شانہ بشانہ کھڑے ہیں، بھارت کی کسی بھی جارحیت کا منہ توڑ جواب دیا جائے گا۔”
بھارتی جارحیت کی مذمت، شہداء کو خراج عقیدت
مقررین نے بھارت کی طرف سے نہتے شہریوں کو نشانہ بنانے، شہادتوں اور املاک کی تباہی کی شدید الفاظ میں مذمت کی اور شہداء کے لواحقین سے ہمدردی کا اظہار کیا۔ مقررین نے مزید کہا کہ:
“بھارت کو ایسا سبق سکھایا گیا ہے جو وہ کبھی نہیں بھول سکے گا، پوری دنیا ہماری افواج کی بہادری کو سراہ رہی ہے۔”
بینرز، قومی پرچم، اور جذبہ حب الوطنی
ریلی کے شرکاء پاکستان و آزادکشمیر کے پرچموں اور ملی بینرز کے ساتھ شریک تھے، جبکہ شہریوں کا جوش و جذبہ دیدنی تھا۔ اس موقع پر شہریوں نے پاکستان، افواج پاکستان اور کشمیر کی آزادی کے حق میں نعرے بھی لگائے۔
