دھیرکوٹ(ڈیلی پرل ویو)سابق وزیراعظم آزادکشمیر ومرکزی راہنما پاکستان مسلم لیگ ن راجہ محمد فاروق حیدر خان نے کہا ہے کہ پیپلزپارٹی کی جانب سے دھاندلی کا الزام سمجھ سے بالاتر ہے،پی ٹی آئی کے ٹکٹ پرا سمبلی میں پہنچنے والے اراکین پیپلزپارٹی میں شامل ہوئے اور الزام مسلم لیگ ن کی مرکزی حکومت پر لگارہے ہیں،مسلم لیگ ن اس وقت آزادکشمیر کی سب سے بڑی جماعت ہے،2021ء کے انتخابات میں عمران خان نے ہمارے مینڈیٹ پر ڈاکہ ڈالااس کے باوجود چند ایک کو چھوڑ کر جماعت نے اتحاد کا مظاہرہ کیا۔2016ء سے لیکر 2021ء تک جماعت کے عہدیداران،ضلعی عہدیداران،یوتھ ونگ ایم ایس ایف،حکومتی صوابدیدی عہدوں میں میرٹ پر شامل رہیں،کسی سے انتخابی اتحاد فی الحال زیر غور نہیں،میاں مسلم لیگ ن کے اپنے امیدواران جیتنے کی پوزیشن میں ہونگے تو پھر کسی سے اتحاد کا کیا فائدہ۔ان خیالات کا اظہار انہوں نے مسلم لیگ ن دھیر کوٹ کے دفتر میں کارکنان سے خصوصی نشست کے دوران کیا۔اس موقع پر مرکزی نائب صدر وسابق امیدوار اسمبلی راجہ افتخار ایوب،صدر مسلم لیگ ن دھیر کوٹ راجہ اشراف احمد سمیت بڑی تعداد میں کارکنان موجود تھے۔راجہ محمد فاروق حیدر خان نے کہا کہ مسلم لیگ ن نے عملی طورپر ثابت کیا ہے کہ آج ریاست مالی طورپر خود مختار ہے،بااختیار ہے تو اس کا کریڈٹ مسلم لیگ ن کو جاتا ہے۔آزادکشمیر کے اندر ہر شعبہ میں ن لیگ نے بہتری لائی،موجودہ ہائبرڈ نظام نے سیاسی نظام کو جہاں ناقابل نقصان پہنچایا وہیں ترقی اور خوشحالی کا جو سفر 2016 سے 2021ء تک جاری رہا کو بھی ڈی ٹریک کردیا ہے،جس کے باعث ابھی اسے واپس لانے میں وقت لگے گا۔ریاست میں میرٹ پر روزگار دینے کا کریڈٹ مسلم لیگ ن کے حصے میں آیا ہے،دھیر کوٹ میں لوگوں،عورتوں نے میرٹ کے لیے ننگے پاؤں مارچ کیا مگر پھر بھی انہیں انصاف نہیں ملا،وہی لوگ جب مسلم لیگ ن حکومت آئی تو اعلیٰ عہدوں پر اپنی قابلیت کی وجہ سے لگے۔سابق وزیراعظم نے چمیاٹی،چمن کوٹ،ہل سرنگ کے مقام پر بھی کارکنان سے ملاقاتیں کیں،اس موقع پر باقی امور آئندہ انتخابات کے حوالے سے تفصیلی تبادلہ خیال کیا گیا۔
0
