مظفرآباد (ڈیلی پرل ویو) — محکمہ شہری دفاع آزاد جموں و کشمیر کی جانب سے سول ڈیفنس کے تحت تربیتی پروگرامز کا سلسلہ بھرپور انداز میں جاری ہے۔ ان پروگرامز کے تحت آزاد کشمیر کے مختلف اضلاع میں عملی مشقیں، آگاہی لیکچرز اور ابتدائی امداد کی تربیت فراہم کی جا رہی ہے۔
ترجمان محکمہ شہری دفاع کے مطابق، ان سرگرمیوں کا مقصد عوام میں ہنگامی حالات، قدرتی آفات اور جنگی صورتحال میں خود حفاظتی اقدامات سے متعلق شعور اجاگر کرنا اور رضاکاروں کو بروقت کارروائی کے لیے تیار رکھنا ہے۔
ان پروگرامز میں طلبہ، اساتذہ، سرکاری ملازمین، اور مقامی کمیونٹی کے افراد کو بھی شامل کیا جا رہا ہے تاکہ ہر طبقہ فکر کو سول ڈیفنس کی اہمیت سے روشناس کرایا جا سکے۔
مزید کہا گیا کہ شہری دفاع کے رضاکاروں کو ریسکیو، فائر فائٹنگ، ابتدائی طبی امداد اور ایمرجنسی انخلاء جیسے اہم موضوعات پر مکمل تربیت دی جا رہی ہے۔
محکمہ شہری دفاع نے اس بات کا اعادہ کیا ہے کہ یہ مہم آئندہ ہفتوں میں مزید علاقوں تک توسیع پائے گی تاکہ “محفوظ شہری، محفوظ معاشرہ” کے وژن کو عملی شکل دی جا سکے۔
