ڈیلی پرل ویو.مظفرآباد(نامہ نگار) اکاؤنٹس ویلفیئر ایسوسی ایشن کے جنرل سیکرٹری سید شجاعت علی کاظمی نے اپنے وضاحتی بیان میں کہا ہے کہ محکمہ حسابات آزاد جموں و کشمیر میں تنخواہوں اور واجبات کی ادائیگی کے لیے نیا MPG سسٹم کامیابی کے ساتھ نافذ العمل ہو چکا ہے۔
انہوں نے بتایا کہ اس جدید اور تیز رفتار نظام کے تحت اب کسی بھی قسم کی ادائیگی روایتی چیک کے بجائے براہِ راست متعلقہ ملازم، ادارے یا سپلائر کے بینک اکاؤنٹ میں منتقل ہو جاتی ہے، جس سے شفافیت، سہولت اور بروقت ادائیگی کو یقینی بنایا جا رہا ہے۔
سید شجاعت علی کاظمی کے مطابق اب تک 95 فیصد سے زائد ادائیگیاں اس سسٹم کے ذریعے مکمل ہو چکی ہیں۔ صرف چند کیسز میں تکنیکی نوعیت کی رکاوٹیں بعض بینکوں کی سطح پر سامنے آئی ہیں، جن کے حل کے لیے محکمہ حسابات نے فوری طور پر بینکوں کے ساتھ رابطہ کر کے تحقیقات کا آغاز کر دیا ہے تاکہ نظام کو مزید مؤثر بنایا جا سکے۔
انہوں نے بتایا کہ گزشتہ دنوں انٹرنیٹ کی بندش اور کمزور رفتار کے باعث کچھ ادائیگیوں میں وقتی تاخیر ضرور ہوئی، تاہم محکمہ حسابات کی ٹیم ان مسائل کو حل کرنے کے لیے متحرک ہے۔
سید شجاعت علی کاظمی نے محکمہ حسابات کے افسران اور عملے کی شب و روز کی محنت کو سراہتے ہوئے کہا کہ انہی کی پیشہ ورانہ صلاحیتوں اور انتھک کاوشوں کی بدولت یہ نظام مختصر عرصے میں کامیابی سے فعال ہوا۔
انہوں نے مزید کہا کہ اس سسٹم کے نفاذ سے مالی نظم و ضبط، شفافیت اور عوامی اعتماد میں نمایاں بہتری متوقع ہے۔
انہوں نے تمام محکموں کے افسران، ملازمین اور اداروں سے اپیل کی کہ وہ وقتی تکنیکی مسائل پر صبر و تعاون کا مظاہرہ کریں تاکہ نظام کو مزید بہتر بنایا جا سکے۔
اکاؤنٹس ویلفیئر ایسوسی ایشن کے مطابق محکمہ حسابات کی ایڈمنسٹریشن اور متعلقہ آفیسران صورتحال پر مکمل نظر رکھے ہوئے ہیں اور نئے سسٹم کے تحت تمام ادائیگیوں کی درستگی و بروقت فراہمی کے لیے ہرممکن اقدامات کیے جا رہے ہیں۔
