مظفرآباد چہلہ بانڈی وارڈ میں گزشتہ کئی سالوں سے قبرستان کا معاملہ شدت اختیار کرتا جارہا ہے

مظفرآباد (ڈیلی پرل ویو)چہلہ بانڈی وارڈ مظفرآباد میں گزشتہ کئی سالوں سے قبرستان کا معاملہ شدت اختیار کرتا جارہا ہے۔خاص کر نیلم،حلقہ کوٹلہ اور لچھراٹ کی بڑی آبادی رہائش پذیر ہے۔جس میں بھارتی فائرنگ سے متاثرہ افراد بھی شامل ہیں۔ان خیالات کا اظہار پینشنرز ایسوسی ایشن کے رہنماؤں مظفر حسین مہناس،محمد عارف،مقبول حسین،رفیع اللہ قریشی ایڈووکیٹ،محمد اکرم میر نے میڈیا نمائندوں سے گفتگو کرتے ہوئے کیا انہوں نے کہاکہ دوسرے علاقوں سے آکر آباد ہونے والی آبادی کے پاس پہلے ہی قبرستان کے لئے زمین نہ تھی۔اب لوکل آبادی کی بھی ختم ہوچکی ہے۔انہوں نے کہاکہ برف باری اور بارش میں میت کو لے کر جانا بہت مشکل ہوتا ہے۔اور بعض اوقات مزدور طبقے کے لیے آبائی علاقوں میں میت کو لے کر جانا مشکل ترین کام ہو جاتا ہے۔غریب عوام کے پاس مالی وسائل نہ ہونے کی وجہ سے شدید دشواری پیش آتی ہے۔مظفر حسین مہناس نے وزیراعظم آزاد کشمیر،چیف سیکرٹری،سنئیر وزیر میاں وحید،وزیر حکومت سردار جاوید ایوب،وزیر صحت عامہ بازل نقوی سے مطالبہ کیا ہے کہ وہ اس معاملے میں اپنا خصوصی کردار ادا کریں اور قبرستان کے سنگین صورت حال کا فوری نوٹس لیں حل نکالیں۔