مظفرآباد (ڈیلی پرل ویو)فوڈ اتھارٹی مظفرآباد کا اولڈ سیکرٹریٹ، گھڑی پن مارکیٹ میں ہوٹلز، بیکری کارخانوں، جنرل و کریانہ سٹورز، ریفریشمنٹ سنٹرز اور ڈرائی فروٹ شاپس کا معائنہ۔دورانِ چیکنگ اشیائے خوردونوش کے معیار، صفائی ستھرائی، فوڈ ہینڈلرز کی حفظانِ صحت، پیکنگ، ایکسپائری ڈیٹ اور ذخیرہ کرنے کے تمام مراحل کا تفصیلی جائزہ لیا گیا۔ کارروائی کے دوران غیر معیاری اور مضر صحت اشیاء موقع پر تلف کر دی گئیں جبکہ فوڈ سیفٹی قوانین کی خلاف ورزی پر متعدد تاجروں کو جرمانے اور اصلاحی نوٹسز جاری کیے گئے۔ اسسٹنٹ فوڈ سیفٹی آفیسر قاضی شفیق الرحمن نے ہمراہ ٹیم دونوں مارکیٹس میں مختلف فوڈ پوائنٹس کا معائنہ کرتے ہوئے دکانداروں کو واضح ہدایات جاری کیں کہ صفائی ستھرائی اور معیار خوراک پر ہر صورت عملدرآمد یقینی بنایا جائے۔ اس کارروائی پر ڈسٹرکٹ فوڈ کنٹرولر مظفرآباد ابرار احمد میر نے کہا کہ شہریوں کو محفوظ، معیاری اور صحت بخش خوراک کی فراہمی فوڈ اتھارٹی کی اولین ترجیح ہے، فیلڈ ٹیمیں شہر بھر میں بلا امتیاز کارروائیاں جاری رکھے ہوئے ہیں اور قوانین کی خلاف ورزی پر سخت اقدامات سے گریز نہیں کیا جائے گا۔ انہوں نے تاجروں پر زور دیا کہ فوڈ سیفٹی اسٹینڈرڈز پر مکمل عمل کریں تاکہ شہریوں تک ہر سطح پر معیاری خوراک پہنچ سکے۔ عوام کسی بھی شکایت یا نشاندہی کے لیے فوڈ اتھارٹی ہیلپ لائن 1280 پر اطلاع کریں۔
0
