آزاد کشمیر پولیس کے 60ویں ریکروٹ کورس کی پاسنگ آوٹ پریڈ کی تقریب پولیس لائن مظفرآباد میں منعقد ہوئی۔وزیراعظم آزادکشمیر چوہدری انوارالحق نے تقریب میں بطور مہمان خصوصی شرکت کی اورپاسنگ آوٹ پریڈ کامعائنہ کیا اور 60ویں ریکروٹ کورس میں نمایاں کارکردگی پر جوانوں کو حسن کارکردگی سرٹیفیکیٹ اور نقد انعامات دئے۔ اس موقع پر انسپکٹر جنرل پولیس آزاد کشمیر رانا عبد الجبار ان کے ہمراہ موجود تھے۔ اس موقع پر 60 ویں ریکروٹ کورس کو مکمل کرنے والے ریکروٹس سے حلف لیا گیا۔ انسپکٹر جنرل پولیس آزاد کشمیر رانا عبدالجبار نے مہمان خصوصی وزیر اعظم آزاد کشمیر چوہدری انوار الحق کا بالخصوص اور دیگر معزز مہمانان، شرکاء کا پاسنگ آوٹ پریڈ میں شرکت پر شکریہ ادا کرتے ہوئے کہا کہ سیکیورٹی کو درپیش نئے چیلنجز کو مد نظر رکھتے ہوئے اینٹی رائیٹ فورس کے قیام کا جو ہم نے وعدہ کیا تھا الحمدللہ آج پایہ تکمیل تک پہنچ چکا ہے۔ آج ہم فخر سے کہ سکتے ہیں کہ ترکش ماڈل پر تربیت حاصل کرنے والے یہ ریکروٹ شہریوں کو امن فراہم کرنے کیلئے اپنی جان دینے سے بھی گریز نہیں کریں گے۔ آج ہم یہ کہنے میں حق بجانب ہیں کہ یہ ریکروٹس ریاست کی دی گئی طاقت کا استعمال قانون کے دائرے میں رہتے ہوئے کریں گے اور بدامنی پھیلانے والوں کو منہ کی کھانی پڑے گی۔ ہم نے سیکیورٹی کو درپیش نئے چیلنجز کو مد نظر رکھتے ہوئے آزاد کشمیر پولیس کے استعداد کار کو بڑھانے کیلئے اہداف مقرر کیے ہیں جن میں جدید طرز کا کاونٹر ٹیررازم ڈیپارٹمنٹ اور ٹریننگ سنٹرز شامل ہیں جو پولیس فورس کے جوانوں کو انوسٹی گیشن کی جدید تیکنیکس سے روشناس کرے گی۔ انہوں نے کہا کہ ریاست میں امن و امان کی صورتحال کو برقرار رکھنے کیلئے درکار وسائل فراہم کئے جس کی مثال نہیں ملتی۔ آزاد کشمیر کے تمام اضلاع میں شہریوں کو فوری سہولیات کی فراہمی کیلئے خدمت مراکز کا قیام بھی موجودہ حکومت کا بہترین کارنامہ ہے۔ وزیر اعظم آزاد کشمیر نے مالی بحران کے باوجود محکمہ پولیس کی ترقی کیلئے درکار وسائل فراہم کئے جس پر ہم ان کے مشکور ہیں۔ آزاد کشمیر کی پولیس فورس شہریوں کو پرامن ماحول فراہم کرنے کیلئے اپن جان دینے سے گریز نہیں کریں گے۔ شہری سوشل میڈیا پر فساد پھیلانے والوں کی طرف کان نہ دھریں اور ریاست کی ترقی اپنا مثبت کردار ادا کریں۔ انسپکٹر جنرل پولیس آزاد کشمیر رانا عبد الجبار نے پاس آوٹ ہونے والے جوانوں اور تربیت فراہم کرنے والے اساتذہ کو مبارکباد دی۔ پاسنگ آوٹ تقریب کے اختتام پر مظاہرین کی جانب سے مختلف شکلوں میں کئے گئے احتجاج کے خلاف نبرد آزما ہونے کیلئے اینٹی رائیٹ دستوں نے جدیدطریقوں پر مشتمل شاندار عملی مشقوں کا مظاہرہ کرکے شرکاء کی جانب سے داد وصول کی۔تقریب میں سینئر موسٹ وزیر کرنل(ر) وقار احمد نور، وزراء حکومت فیصل ممتاز راٹھور، چوہدری اظہر صادق، دیوان علی خان چغتائی، جاوید بڈھانوی،عامر یاسین چوہدری ، مشیر حکومت محترمہ نثارہ عباسی، ایڈیشنل چیف سیکرٹری جنرل محترمہ مدحت شہزاد، سیکرٹریز حکومت، اعلی سول و فوجی حکام اور عوام کی کثیر تعداد نے شرکت کی۔
0
