ڈیلی دومیل نیوز،سماہنی (نامہ نگار) اسسٹنٹ کمشنر سماہنی کی زیر صدارت 12 ربیع الاول، جشنِ عید میلاد النبی ﷺ کے حوالے سے جائزہ اجلاس منعقد ہوا۔ اجلاس میں پندرہ سو سالہ جشن عید میلاد النبی ﷺ کو مذہبی جوش و جذبے اور شایانِ شان طریقے سے منانے کا عزم کیا گیا۔
اجلاس میں طے پایا کہ سرکاری عمارتوں، مساجد اور مارکیٹوں میں چراغاں کیا جائے گا جبکہ حسب روایت مرکزی جلوس مقررہ راستوں سے نکالے جائیں گے۔ بڑے جلوسوں کا انعقاد ٹاؤن کمیٹی سماہنی، چوکی، جنڈالہ اور پونا کے تجارتی مراکز میں کیا جائے گا جہاں مضافاتی علاقوں سے بھی عوام کی بڑی تعداد شریک ہوگی۔
پرامن ماحول اور شہریوں کی سہولت کے لیے پولیس کی جانب سے خصوصی سیکیورٹی پلان مرتب کیا گیا ہے، جبکہ ٹریفک کے بہتر انتظامات کے لیے بھی جامع حکمتِ عملی ترتیب دی گئی ہے۔ اس موقع پر علمائے کرام سیرتِ طیبہ پر روشنی ڈالیں گے۔
اجلاس میں تحصیلدار محمد عثمان، نائب تحصیلدار چوہدری نذیر احمد، چیئرمین ٹاؤن کمیٹی سماہنی راجہ ذوالقرنین خان، صدر ایڈیشنل ڈسٹرکٹ بار ایسوسی ایشن چوہدری منیر اللّٰہ ایڈووکیٹ، ایم ایس تحصیل ہیڈکوارٹر ہسپتال ڈاکٹر عمیر فاضل، صحافی شجاعت اقبال، بابو افتخار احمد محکمہ شاہرات، سینئر کلرک محکمہ زراعت چوہدری متین یوسف، سیکرٹری یونین کونسل منانہ عبدالوحید کٹوچ، ٹریفک انچارج سب انسپکٹر عبدالعزیز، محمد خرم الیاس سمیت دیگر نے شرکت کی۔
شرکاء نے انتظامیہ کی جانب سے کیے جانے والے اقدامات کو سراہتے ہوئے کہا کہ جشن عید میلاد النبی ﷺ کے موقع پر امن، اتحاد اور اخوت کا عملی مظاہرہ کیا جائے گا۔
