ڈیلی پرل ویو.جہلم ویلی: ڈسٹرکٹ ہیلتھ آفیسر ڈاکٹر طاہر رحیم مغل کی سربراہی میں ضلع جہلم ویلی میں حفاظتی ٹیکہ جات (Routine Immunization) کی افادیت، سماجی اہمیت، اور کمیونٹی شمولیت کو فروغ دینے کے لیے ایک ہمہ جہت آگاہی سیشن منعقد کیا گیا، جس میں مختلف شعبہ ہائے زندگی سے وابستہ نمائندگان نے بھرپور شرکت کی۔
عوامی نمائندوں اور ضلعی قیادت کی شرکت
سیشن میں چیئرمین ضلع کونسل طیب منظور کیانی نے خصوصی شرکت کی، جبکہ ضلعی انتظامیہ، محکمہ صحت عامہ، قبائلی عمائدین، مذہبی اسکالرز، صحافیوں، اساتذہ، سول سوسائٹی اور مقامی کمیونٹی راہنماؤں کی قابل ذکر موجودگی نے سیشن کو حقیقی معنوں میں کمیونٹی انگیجمنٹ پلیٹ فارم میں تبدیل کر دیا۔
ویکسینیشن کی اہمیت پر بریفنگ
سیشن میں ڈاکٹر طاہر رحیم مغل (ڈی ایچ او)، قراہ العین (ای پی آئی ٹریننگ ڈائریکٹر)، عبدالجبار لون (سرویلنس ڈائریکٹر) اور ابرار سرور عباسی (ڈسٹرکٹ سپرنٹنڈنٹ ویکسینیشن) نے تفصیلی بریفنگ دی۔
شرکاء کو مندرجہ ذیل بیماریوں سے بچاؤ کے لیے بروقت اور مکمل ویکسینیشن کی اہمیت سے آگاہ کیا گیا:
پولیو
خسرہ
ڈفتھیریا
تشنج
ہیپاٹائٹس بی
نمونیا
والدین اور کمیونٹی ممبران کو ویکسینیشن مہمات میں فعال کردار ادا کرنے کی اپیل کی گئی۔
عالمی شراکت دار اداروں کو خراجِ تحسین
سیشن کے دوران ورلڈ ہیلتھ آرگنائزیشن (WHO)، یونیسف (UNICEF)، گاوی (GAVI) اور دیگر عالمی و قومی شراکت دار اداروں کی تکنیکی و مالی معاونت پر خراج تحسین پیش کیا گیا۔ ان اداروں کی مدد سے نہ صرف وسائل کی فراہمی ممکن ہوئی بلکہ ہیلتھ ورکرز کی تربیت اور کمیونٹی روابط کو فروغ ملا۔
ایچ پی وی ویکسین مہم پر بریفنگ
سیشن میں 15 تا 27 ستمبر 2025 کو منعقد ہونے والی ایچ پی وی سرویکل کینسر ویکسینیشن مہم پر بھی روشنی ڈالی گئی۔
اس مہم کے تحت 9 تا 14 سالہ بچیوں کو کینسر سے بچاؤ کے ٹیکے دیے جائیں گے۔
مذہبی، قبائلی اور تعلیمی راہنماؤں نے مہم کی بھرپور حمایت کا اظہار کرتے ہوئے کہا کہ وہ معاشرے میں اس پیغام کو عام کریں گے۔
