ڈیلی پرل ویو،مظفرآباد (اسٹاف رپورٹر) — آزاد جموں و کشمیر یونیورسٹی مظفرآباد میں پاکستان کا یومِ آزادی قومی جذبے اور عزمِ نو کے ساتھ منایا گیا، اس عہد کے ساتھ کہ ملک کی سلامتی و استحکام کے لیے ہر قربانی دی جائے گی۔ دن کا آغاز ایڈمنسٹریشن بلاک میں پرچم کشائی سے ہوا، جو رجسٹرار پروفیسر ڈاکٹر سعادت حنیف ڈار، کنٹرولر امتحانات پروفیسر ڈاکٹر واجد عزیز لون اور ڈائریکٹر فنانس پروفیسر ڈاکٹر محمد بشارت نے انجام دی۔ اساتذہ، عملے اور ملازمین کی بڑی تعداد نے شرکت کی اور پاکستان و کشمیر کی آزادی کے لیے خصوصی دعائیں کیں۔
بعد ازاں مرکزی تقریب میں ملی نغمے، تقاریر اور کیک کاٹنے کی تقریب شامل تھی۔ مہمانِ خصوصی ایڈیشنل چیف سیکرٹری (جنرل) محترمہ مدحت شہزاد نے آزادی کو اللہ کی عظیم نعمت قرار دیتے ہوئے کہا کہ اس کی قدر اور احترام ہم سب کی ذمہ داری ہے، اور ملک کی ترقی و خوشحالی کے لیے عملی کردار ادا کرنا ضروری ہے۔ انہوں نے جامعہ کشمیر کو اپنا “دوسرا گھر” قرار دیا اور ریٹائرمنٹ کے بعد بھی خدمات جاری رکھنے کا عزم ظاہر کیا۔
ڈین فیکلٹی آف ہیومینٹیز اینڈ سوشل سائنسز میرٹوریس پروفیسر ڈاکٹر سید ندیم حیدر بخاری نے آزادی کو اشرف المخلوقات کے لیے سب سے بڑی نعمت قرار دیتے ہوئے پاک فوج کی جرات و بہادری کو خراج تحسین پیش کیا۔ رجسٹرار پروفیسر ڈاکٹر سعادت حنیف ڈار نے کہا کہ آزادی ہمارے آبا و اجداد کی قربانیوں کا ثمر ہے اور اب ہر شہری پر فرض ہے کہ ملک کی ترقی میں اپنا کردار ادا کرے۔
تقریب کی نظامت ایڈیشنل رجسٹرار سردار ظفر اقبال نے کی اور اختتام پر کیک کاٹا گیا۔
