ڈیلی پرل ویو، مظفرآباد (نامہ نگار)آزادجموں و کشمیر کے وزیراعظم چوہدری انوارالحق سے یونین کونسل کس چناتر سے راسب لطیف چھورا، چوہدری نصیر احمد ٹھیکیدار، چوہدری افسر رحیم، ڈاکٹر چوہدری طاہر اور چوہدری طاہر ایوب نے ملاقات کی۔ دریں اثناء یونین کونسل بڑھنگ سے چوہدری نذیر احمد، اظہر محمود، محمد حنیف، اصغر احمد اور مہر سرور نے بھی وزیراعظم سے ملاقات کی۔
وزیراعظم چوہدری انوارالحق نے وفود سے گفتگو کرتے ہوئے کہا کہ جہاں ہم حقوق کی بات کرتے ہیں وہیں اپنے فرائض پر بھی توجہ دینا ضروری ہے تاکہ معاشرہ ترقی کی راہ پر گامزن ہو سکے۔ انہوں نے کہا کہ “میں پچھلے ستر سال کا حساب نہیں دے سکتا لیکن اپنے دو سال چار ماہ کا حساب ضرور دے سکتا ہوں۔ اللّہ پاک کے فضل اور والدہ محترمہ کی دعاؤں کے صدقے آزادکشمیر میں گورننس کے نظام کو بدل کر رکھ دیا ہے۔”
وزیراعظم نے کہا کہ کسی کو ماورائے قانون کام کی اجازت نہیں ہے کیونکہ جب وزیراعظم خود کو قانون سے بالاتر نہیں سمجھتا تو دوسروں کو بھی یہ جرأت نہیں ہونی چاہیے۔ انہوں نے مزید کہا کہ عوام کو ہیلتھ پیکج دیا گیا، ہسپتالوں کو اپ گریڈ کیا گیا، میرٹ پر ڈاکٹروں کی تقرری یقینی بنائی گئی تاکہ علاج کی سہولتیں ان کی دہلیز پر میسر ہوں۔
انہوں نے کہا کہ کارڈیک ہسپتال مظفرآباد کو فعال کیا، سوشل پروٹیکشن فنڈ قائم کیا، بائیو میٹرک نظام کے نفاذ سے سرکاری وسائل کے ضیاع کو روکا اور مافیاز کے خلاف سخت اقدامات کیے۔ وزیراعظم نے بتایا کہ 15 سال بعد اسسٹنٹ کمشنر اور سیکشن آفیسرز کی آسامیوں پر پی ایس سی کے ذریعے تعیناتیاں عمل میں لائی گئیں، جس سے لائق نوجوانوں کو آگے آنے کا موقع ملا۔
چوہدری انوارالحق نے کہا کہ “گڈ گورننس ہی اصل ترقی ہے، میرٹ کا نظام قائم ہو چکا ہے اور انشاءاللہ یہ ترقی کا سفر جاری رہے گا۔”
وفود نے وزیراعظم کی قیادت اور گڈ گورننس کے اقدامات کو سراہا اور ان کی کاوشوں کو آزادکشمیر کی ترقی کے لیے سنگِ میل قرار دیا۔
