ڈیلی پرل ویو.مظفرآباد (نمائندہ خصوصی) سیکرٹری فوڈ اتھارٹی آزاد جموں و کشمیر کی خصوصی ہدایت پر فوڈ اتھارٹی ٹیم نے کنگ عبداللہ یونیورسٹی چھتر کلاس کے کیفے ٹیریا اور ہاسٹل میس کا اچانک معائنہ کیا۔ اس دوران موبائل فوڈ ٹیسٹنگ لیب کے ذریعے واٹر فلٹریشن پلانٹس اور کھانے پینے کی اشیاء کے نمونے حاصل کر کے ٹیسٹ کیے گئے۔
لیبارٹری رپورٹ کے مطابق کیفے ٹیریا کا واٹر فلٹریشن پلانٹ تسلی بخش قرار دیا گیا جبکہ ہاسٹل میس کا فلٹریشن پلانٹ بند پایا گیا اور حاصل شدہ پانی غیر معیاری ثابت ہوا۔ معائنے کے دوران کھانے کی تیاری میں استعمال ہونے والے آئل کا TPC لیول 36 پایا گیا، جو کہ نارمل 24 سے زیادہ تھا، جسے موقع پر ہی تلف کر دیا گیا۔
تفصیلات کے مطابق اسسٹنٹ فوڈ سیفٹی آفیسر قاضی شفیق الرحمن نے فوڈ ٹیکنالوجسٹ اور فوڈ اتھارٹی ٹیم کے ہمراہ کچن ایریاز، استعمال شدہ اجزاء، مصالحہ جات، جوسز، مشروبات اور خوراک کی ہینڈلنگ کے معیار کا تفصیلی جائزہ لیا۔ جوسز اور مشروبات کی لیبلنگ، کوالٹی اور ایکسپائری ڈیٹ کی بھی باریک بینی سے جانچ کی گئی تاکہ طلبہ کو ہر لحاظ سے معیاری اور محفوظ خوراک فراہم کی جا سکے۔
فوڈ اتھارٹی کے ذمہ داران نے ہاسٹل میس فلٹریشن پلانٹ کو فوری بحال کرنے اور آئندہ صرف معیاری آئل استعمال کرنے کی ہدایت جاری کی۔ اس موقع پر ڈسٹرکٹ فوڈ کنٹرولر مظفرآباد/جہلم ویلی، ابرار احمد میر نے کہا کہ طلبہ قوم کا قیمتی سرمایہ ہیں، ان کی صحت پر کوئی سمجھوتہ نہیں کیا جائے گا۔ فوڈ اتھارٹی تعلیمی اداروں میں معیاری خوراک کی فراہمی کے لیے اقدامات جاری رکھے ہوئے ہے اور غفلت برتنے والوں کے خلاف سخت کارروائی عمل میں لائی جائے گی۔
انہوں نے مزید کہا کہ شہریوں کی صحت کا تحفظ فوڈ اتھارٹی کی اولین ترجیح ہے اور اسی مقصد کے تحت شہر کے تمام تعلیمی اداروں کی کنٹینز کی باقاعدہ چیکنگ کی جا رہی ہے۔ عوام کو ہدایت کی گئی ہے کہ کسی بھی مشکوک یا غیر معیاری خوراک اور صفائی کے ناقص انتظامات کی اطلاع فوری طور پر فوڈ اتھارٹی ہیلپ لائن 1280 پر دیں تاکہ بروقت کارروائی ممکن بنائی جا سکے۔
