مظفرآباد (ڈیلی پرل ویو) جہلم ویلی میں امن و امان اور سیکیورٹی صورتحال کے حوالے سے ڈپٹی کمشنر محترمہ بینش جرال کی زیر صدارت اہم اجلاس منعقد ہوا، جس میں ایس پی جہلم ویلی عباس علی گردیزی، ڈی ایس پیز، اسسٹنٹ کمشنر کامران خان، افسر مال، معززین علاقہ اور مختلف مکاتب فکر سے تعلق رکھنے والے علمائے کرام نے شرکت کی۔
اجلاس میں ضلع کی سیکیورٹی صورتحال، امن و امان کے قیام اور عوامی تحفظ کے لیے مربوط حکمتِ عملی پر تفصیلی غور کیا گیا۔
ڈپٹی کمشنر بینش جرال نے خطاب کرتے ہوئے کہا کہ عوام کی جان و مال کا تحفظ اولین ترجیح ہے، اس مقصد کے لیے سول سوسائٹی، علماء اور پولیس انتظامیہ کو مل کر اپنی ذمہ داریاں مزید فعال انداز میں ادا کرنی ہوں گی۔ انہوں نے کہا کہ تحصیل سطح پر ایس ڈی ایمز اور پولیس حکام قریبی رابطہ رکھیں تاکہ ہنگامی صورتحال میں بروقت ردعمل دیا جا سکے۔
اجلاس میں فیصلہ کیا گیا کہ سیکیورٹی کے حوالے سے ایک جامع پلان تشکیل دیا جائے گا، داخلی و خارجی راستوں پر چیکنگ مؤثر بنائی جائے گی، مشکوک عناصر پر کڑی نظر رکھی جائے گی اور قانون کی عملداری کو یقینی بنایا جائے گا۔
اس موقع پر ایس پی عباس علی گردیزی نے کہا کہ جہلم ویلی کو امن کا گہوارہ بنانا سب کی مشترکہ ذمہ داری ہے۔ پرامن احتجاج سب کا حق ہے مگر کسی کو راستہ بند کرنے یا قانون ہاتھ میں لینے کی اجازت نہیں دی جائے گی۔
