ڈیلی پرل ویو.ضلع میرپور میں بھی پولیو کے خاتمے کے لئے یکم سے 04 ستمبر 2025 تک چار روزہ انسداد پولیو مہم کا افتتاح ڈسٹرکٹ بار ایسوسی ایشن کے صدر چوہدری محمود حسین پلاکوی ایڈووکیٹ نے ڈسٹرکٹ ہیلتھ آفس میر پور میں پانچ سال تک کی عمر کے بچوں کو پولیو ویکسین کے قطرے پلا کر کیا۔افتتاحی تقریب کے موقع پرڈسٹرکٹ ہیلتھ آفیسرڈاکٹر فدا حسین راجہ، ڈپٹی میڈیکل سپرنٹنڈنٹ ڈویژنل ہیڈ کوارٹر ٹیچنگ ہسپتال میرپور ڈاکٹر ماریہ ذوالفقار، جنرل سیکرٹری ڈسٹرکٹ بار ایسوسی ایشن فیاض احمد چوہدری ایڈووکیٹ، ADHO ڈڈیال ڈاکٹر شمائلہ کرن،کشمیر پریس کلب کی کشمیر کمیٹی کے چیئرمین ظفر اقبال مغل نے بھی بچوں کو پولیو کے حفاظتی قطرے پلائے۔اس موقع پر ایڈیشنل پرنسپل میڈیکل آفیسر ڈاکٹر فاطمہ یعقوب، ڈسٹرکٹ انفارمیشن آفیسر محمد جاوید ملک،اسسٹنٹ کوآرڈی نیٹر نیشنل پروگرام ڈاکٹر فاریہ جاوید،اسسٹنٹ ڈائریکٹر سرویلینس محمد ریاض، ڈی ایس وی عبدالوحید، NIDs فوکل پرسن ضلع میرپور، نعمان شہزاد UCSP، ڈیٹا فوکل پرسن محمد احسان،سٹور کیپر غلام ربانی،اے ایس وی ماجد اقبال، یو سی ایم اوز، ایریا سپروائزر اور معززین شہر و عوامی نمائندگان، الیکڑانک و پرنٹ میڈیا کے نمائندگان کے علاوہ محکمہ صحت عامہ کے ملازمین بھی موجود تھے۔
ڈسٹرکٹ ہیلتھ آفیسر میرپور ڈاکٹر فد ا حسین راجہ نے ضلع میرپور میں 04 روزہ پولیو مہم کے حوالے سے بریفینگ دیتے ہوئے کہا کہ محکمہ صحت عامہ ضلع میرپور کی ٹیمیں پورے ضلع میں گھر گھر جا کر پانچ سال تک کی عمر کے تمام بچوں کو پولیو سے بچاوٗ کے قطرے پلائیں گی انہوں نے مزیدکہا کہ پولیو سے بچاوٗ کی مہم کو ایک قومی ومذہبی اور دینی فریضہ کی طرح ادا کرنا نہ صرف حکومت یا محکمہ صحت عامہ کی ذمہ داری ہے بلکہ ہر شہر ی اور تمام مکاتب فکر سے تعلق رکھنے والے افراد کا اس میں کردار ادا کرنا ضروری ہے تاکہ پانچ سال سے کم عمر کا کوئی بھی بچہ پولیو سے بچاؤ کے قطرے پینے سے محروم نہ رہے۔ انہوں نے کہا کہ چار روزہ مہم کے دوران ضلع میرپور میں پانچ سال تک کی عمر کے بچوں کو پولیو کے قطرے پلانے کے لئے ضلع میرپور کو انتالیس یونین کونسلز/وارڈزمیں تقسیم کر کے تربیت یافتہ سپروائزر مقرر کئے گئے ہیں۔ WHO کی ہدایت کے مطابق پولیو مہم کو کامیاب بنانے کے لئے میونسپل کارپوریشن میرپور میونسپل کمیٹی اسلام گڑھ،چکسواری اور میونسپل کمیٹی ڈڈیال کے ساتھ ساتھ ستائیس یونین کونسلز کی سطح پر ٹیموں کے نگرانی کے لئے 02 تحصیل سپروائزر 35یونین کونسل مانیٹرنگ آفیسر زاور 103یونین کونسلزوارڈزانچارج مقرر کئے گئے ہیں۔ ان انچارج ہاء کی نگرانی میں پانچ سال تک کی عمر کے 76656 بچوں کو پولیو کے قطرے پلانے کے لئے 439 موبائل ٹیمیں اور مراکزصحت پر 41 فکسڈ سنٹرز مقرر کیے گئے ہیں نیز والدین کے ہمراہ سفر کرنے والے بچوں کے لئے 14 مختلف ضروری مقامات پر ٹرانزٹ پوائنٹس بھی قائم کئے گئے ہیں۔ انہوں نے عوام الناس سرکاری و نجی سکولز کی انتظامیہ سے اپیل کی ہے کہ گھروں اور سکولز میں آنے والی محکمہ صحت عامہ کی ٹیموں سے تعاون کرتے ہوئے پانچ سال تک کی عمر کے بچوں کو پولیو ویکسین کے قطرے ضرور پلوائیں۔ ڈسٹرکٹ ہیلتھ آفیسر میرپور نے کہا کہ قبل ازیں میر پور کے داخلی و خارجی راستوں اور شہری و دیہی علاقوں میں پولیو ٹیمز فرض شناسی، محنت اور محکمہ صحت عامہ کی بہتر حکمت عملی کے ساتھ ساتھ عوامی تعاون سے پولیو مہم انتہائی کامیاب رہی۔ انہوں نے کہا کہ حکومت محکمہ صحت عامہ کی کامیاب حکمت عملی اور پولیو ٹیموں کی انتھک محنت کی وجہ سے ابھی تک آزادکشمیر میں کوئی پولیو کیس رپورٹ نہیں ہوا عوام الناس کے تعاون کے بغیر پولیو کا مکمل خاتمہ نہیں کیا جا سکتا اس مقصد کو حاصل کرنے کے لئے ہمیں محکمہ صحت عامہ کی پولیو ٹیموں سے بھر پور اور مکمل تعاون کرنا ہو گا ڈسٹرکٹ ہیلتھ آفیسر میرپور ڈاکٹر فدا حسین نے کہا کہ پولیو ٹیموں کی جانفشانی محنت اور فرض شناسی کے جذبوں کو بروئے کا رلاتے ہوئے 01 تا 04 ستمبر 2025پولیو کا سو فیصد ٹارگٹ حاصل کریں گے۔
0
